Ginpaathag ni Engr. Marlon Velez, head it Land Transportation Office ukon LTO Aklan nga ro joint memorandum it Department of Transportation and Communication ukon DOTC ag Department of the Interior and Local Government ukon DILG hay ginbase sa Republic Act 4136 ukon LTO Traffic code.
May kaangtanan kara, hugot nga ginadumilian ro mga local auxillary police nga magkumpiska it driver’s license it mga motorista nga nag-eabag sa batas trapiko.
Mismong ro LTO ag ro deputized agents kaparehas it mga pulis ro may authority nga magkumpiska it mga lisensya it mga motoristang nagaeabag.
Ginpahayag dugang ni Engr. Velez nga ro mga maaprehend nga violators hay may ginata-o sanda nga prescribed ticket temporary drivers license nga raya ro andang gamiton kon nagamaneho it andang behikulo samtang ginaprocess nga maeokat ro andang lisensya.
Ro nasambit nga mandato hay sandig sa naunang desisyon it Korte Suprema ag sa mga probisyong nakabaehag sa idaeom it Republic Act 10930 nga ro pagkumpiska it driver’s license hay pwede eamang nga himuon it LTO.
Madumduman nga nauna eon man nga ginkumpirma it Kalibo Auxillary Police nga nasayuran nanda ro andang mandato kon siin ginahinyo eamang nanda sa mga violators ro andang lisensya agud nga maboe-an it data nga igasueat sa citation ticket.
Pagkatapos kara hay anda nga papirmahon ro driver antes nga ibalik ro lisensya.
Ro gina-imponeran eamang nanda it citation ticket hay ro mga nagaeabag sa municipal ordinance nga hugot nga ginaimplementar sa banwa it Kalibo.
