KALIBO, Aklan — Gin-anunsyo eon ro mga nagdaog sa nagtaliwan nga ika-6 nga Aklan Talibong Festival .
Suno kay SP member Soviet dela Cruz, nagduso it Talibong Festival nga naging madinaeag-on ro nasambit nga festival makaron nga dag-on maskin nga sangkiri eamang nga owa nadayun tuga it ginapatuman nga gun ban it Commission on Elections (Comelec) angot sa bag-o eamang natapos nga mid-term election .
Sa traditional category ukon mga kinadaan nga talibong, ro 1st place hay si Jovit Mirano it Banga nga may premyo nga P5,000.
Ikaywa nga pwesto si Jomar Ropil it Malinao nga may premyo nga P3,500 ag patas sa 3rd place sanday Juanito Natabio it Mobo, Kalibo ag Manuel Legaspi it Kalibo .
Consolation prize winner ro sambilog pang entry ni Jovit Mirano ag Juanito Natabio nga may tig-P500 nga premyo .
Sa pihak nga parte sa non-traditional category, 1st place si Zaldy Yanok nga may premyo nga P5,000 ag 2nd place si Edison Ingalla it Banga nga may P3,500 nga cash prize.
Samtang, sa panama-nami it pagba-id, 1st place si Juanito Natabio nga may P3,000 nga cash prize, pangaywa si Joselito Redecio it Libacao nga may P2,000 nga premyo ag Manuel Legaspi nga may P1,000.
Tatlo kara ro consolation prize winner nga may tig-P500 nga premyo .
Ro cash prize hay mabaton sa andang awarding ceremony.
Ro mga entry nga talibong hay gin display sa Trade Hall it Provincial Capitol kadungan it selebrasyon it Aklan Day ko nagtaliwan nga Abril 25 nga kon sa siin ginapakita kara ro pagiging creative it mga Aklanon blacksmith .
Gin-insister pa ni dela Cruz nga makaron ro tiempo nga suportahan ro Talibong Festival agud nga ma promote ag ma preserve ro importansiya it talibong sa mga ulihing henerasyon.
