MALAY, Aklan — Naga-abot pa eamang sa masobra sa 200 ro nabaton it Comission on Elections (COMELEC) Malay nga aplikasyon sa voter registration para sa Barangay and Sangguniang Kabataan Elections (BSKE) sa November 2026.
Suno kay Atty. Jose Rowell Imperial, election officer it nasambit nga banwa nga raya hay base sa pinaka-ulihing datos it andang ginpatigayon nga Election Registration Board (ERB) hearing.
Posible suno kana nga sa buean it Marso ukon Abril hay madugangan ro numero it aplikasyon nga andang mabaton bangud sa pagtapos it school year.
Mag-eowas kara, ginaeauman nga uman nga magaparehistro ro andang mga ginpang-delete nga pangaean it mga botante bangud sa “failure to vote twice in the election” nga naga-abot sa masobra sa 2,000 nga kaeabanan hay mga taga-isla it Boracay.
Nakataeana man sanda nga magpatigayon it satellite registration sa nagkaeain-eain nga barangay sa banwa it Malay.
Samtang, nagapabilin nga ro Brgy. Manocmanoc ro may pinakamataas nga numero it mga registrants sa bilog nga probinsiya it Aklan nga naga abot sa haeos 12,000.
Kaibahan sa andang plano agud nga makasunod sa patakaran nga 400 voters per precinct hay ro pag-decongest sa Manocmanoc ag Balabag Elementary School kun sa siin target nanda nga i-transfer ro ibang presinto sa Manocmanoc National High School ag Malay National High School agud nga malikawan ro pag-ginutok.
Ro proposisyon hay nakataeana pa nga paga aprubahan it Comelec national headquarters.
Nasayuran nga magabuhay ro voter registration period hasta sa May 18, 2026.
