KALIBO, Aklan—Indi pa makasaylo sa target date nga Abril 8 ro mga negosyante it Kalibo public market sa gintaeana kanda nga temporary relocation site sa San Lorenzo Drive sa terminal it eastern side.
Suno kay Municipal Economic Enterprise and Development Office ukon MEEDO-Kalibo head Mary Gay Quimpo Joel nga owa pa natapos ro pag-ayos it engineering department it LGU-Kalibo sa mga pasilidad it pagasayluhan nga terminal it mga saeakyan sa sangka bakanteng lote maeapit sa City Mall sa F. Quimpo St. Kalibo.
Nauna eon nga ginpahayag it MEEDO-Kalibo nga umpisa sa unang domingo it Abril hay iga-relocate ro mga negosyante sa nasambit nga lugar agud nga maumpisahan ro construction it bag-ong tindahan nga posibleng magabuhay it 12 hasta 13 buean.
Kaibahan sa plano, igabutang ro dry goods section sa sueod it terminal area samtang sa likod sa ginrentahan nga eugta hay ro mga fish , meat ag vegetable section.
Sa pihak nga parte, ginklaru ni Joel nga eubusan nga igasarado sa mga saeakyan ro daywang lane it karsada sa kanto it Toting Reyes St. ag 19 Martyrs St. Extension.
Samtang sa kanto it Roxas Avenue Extension paagto sa sangka mabahoe nga mall hay case to case basis para mataw-an it daean ro pagsueod-guwa it mga heavy equipment ag delivery it mga construction materials.
Engkaso kon may delivery it mga equipment hay temporaryong igasarado ro lugar ag uman nga pagabuksan kon owa eon ginagamit.
Indi suno kana maumpisahan ro construction hasta nga indi ma-transfer ro mga negosyente.
Ginaboeobanta nga magabuhay it kapin sa sang dag-on antes nga matapos ro pag-obra it bag-ong public market nga makatau suno kana it kasoehayan sa parehong bumaeakae ag mga negosyante kun sa siin makaangkon eon it maeapad nga parking space kamana man nga plastado ro mga stalls para sa wet ag dry section.
