KALIBO, Aklan—Eubus nga ginkalipay it Aeta sa isla it Boracay ro pagbisita it mga Obispo sa andang komunidad.
Raya hay sa pihak it andang ginapangatubang nga problema bangud nga nagapameligrong mawad-an sanda it ilistaran matapos nga makapilang beses sanda nga nakabaton it petisyon nga ginapakansela ro Certificate of Land Ownership Award ukon CLOA nga napasaalima kanda ni dating Pangueong Rodrigo Duterte.
Suno kay Romalyn Supetran, sangka lider it Aeta community nga ginapas-an nanda makaron ro mabahoe nga problema bangud nga nagapabilin nga uwa it sabat ro ginpaabot nanda nga hinanaing sa gobyerno angot sa petisyon it land developer nga bukon it suitable for agriculture ro eogta nga ginta-o kanda.
Apang, gin-insister kara nga maabo eon sandang pananom sa lugar ag sa kamatuoran hay ginabaligya nanda ro mga raya sa mga establisyemento partikular ro mga tinuean-on.
Samtang sa pihak nga parte, ginpahayag ni Sister Inah Ellana nga nakipag-istorya kanda ro mga Obispo ag pagkaagahon kato hay nagpaguwa it anunsyo ro Catholic Bishops’ Conference of the Philippine ukon CBCP it suporta para sa mga Aeta.
Gin-apela it CBCP nga i-honor ag respetuhon ro CLOA nga ginta-o sa mga Aeta sa isla it Boracay.
