Nasubuan ro mga Pinoy sa nasyon it Netherlands matapos nga napasaalima sa mga dumueoong si dating Pangueong Rodrigo Duterte.
Raya hay kasunod it pagkaaresto kana it International Criminal Police Organization ukon Interpol kabulig ro Philippine National Police matapos nga ginserbe ro warrant of arrest maghalin sa International Criminal Court ukon ICC kon sa siin nag-atubang eon raya sa ICC chamber para sa pre-trial presentation ko gabie it Biyernes, Marso 14 oras sa Pilipinas.
Suno kay Bombo International Correspondent Jorge Gantalao Comaling, nag-abang sanda sa pag-abot it dating presidente sa The Hague, Netherlands agud nga ipakita ro suporta kay Duterte ag sa anang grupo bilang mga Filipinos.
Ginklaro kara nga uwa sanda it political identity nga ginasandigan kundi ginapakita eamang nanda ro baeatyagan bilang Pilipino nga sa unang kahigayunan sa kasaysayan it nasyon hay ginpasaalima sa dumueoong korte it kaparehong Pinoy ro anang citizen agud nga ibista ro ginapangatubang kara nga kaso sa Pilipinas.
Buot hambaeon eamang sigon kara nga uwa nagasalig ro gobyerno it Pilipinas sa kaugalingon nga gobyerno sa kapas kara nga magbuyot it kaso agud nga pasabton ro mga ginaeapog nga akusasyon kontra sa ginatumod nga may kahimuan it krimen.
Gin-insister ni Comaling nga bilang Pilipino hay boluntaryo sanda nga nagtao it oras agud nga magbantay sa The Hague ag ginpasiguro kara nga una sa maayos nga kondisyon ro dating presidente ag kumpyansa sanda nga madepensahan ro kaugalingon kontra sa mga alegasyon nga ginaeapog kana nga naging daean sa idaeom it anang pagpamuno nga naangkon ro eowas ag malimpyo nga palibot halin sa illegal nga droga ag iba pang krimen.
