KALIBO, Aklan — Magiging atraksyon sa pagahiwaton nga 16th Aklan Product Showcase it Department of Trade and Industry (DTI)-Aklan ro mga produktong himu it mga residenteng naapektuhan it pagpasarado it Isla it Boracay.
Ro product showcase hay pagahiwaton sa sangka mall sa Iloilo City sa maabot nga Agosto 27 hasta Setyembre 2, 2018 nga may tema makaron nga dag-on nga “Bagong Buhay Boracay”.
Nakataeana man nga ilunsar ro “One Aklan”, sangka online marketing platform para sa Aklan products.
Kapin sa 38 exhibitors ro maga-intra sa event kung siin, igabaligya ro andang mga produkto kapareho it festive season decoratives, natural dyed fabrics, trendy fashion accessories ag iba pang souvenir items, kamana man ro home and office furnishings ag ro sikat nga meat and bakery products it probinsiya.
Ro dag-unang marketing event hay sa pakikipagbuligan it Provincial Micro, Small, and Medium Enterprise Development Council.
