Ginapatutukan ni President Ferdinand Marcos Jr. ro pagpatindog it mga bag-o nga imprastruktura para sa mga pumueuyo it Kalayaan Island Group (KIG) partikular ro mga pantalan ag paeuparan.
Suno kay Palace Press Officer ag PCO Usec. Claire Castro, ginmanduan it Presidente ro Department of Public Works and Highways (DPWH) nga magpatigayon eagi it mga tikang para mapabaskog ro pasilidad sa lugar.
Ginapa-agto it Presidente si DPWH Sec. Vince Dizon sa isla para personal nga makita ro kahimtangan ag matumod ro iba pa nga mga kinahangeanon it mga residente sa lugar.
Eakip sa mga inisyal nga rekomendasyon it DPWH ro pagpatindog it pantalan ag runway agud mapadasig ro transportasyon ag suplay sa lugar.
Dugang pa ni Castro, paga-usisaon it DPWH ro mga available nga pondo para matuman ro mga plano it administrasyon.
Nauna eon nga gintaw-an it pondo ko 2025 ro konstruksyon it Lawak Island Shelter Port ag Pag-asa Island Airport.
Gin-obra raya it Palasyo kasunod it panawagan ni Akbayan Party-list Representative Percy Cendaña nga dugangan ro suporta it gobyerno para sa Kalayaan Island Group.
Sa makarun, ginpasiguro it Malacañang nga padayon ang ro andang gina-obra nga tikang agud mangin mayad ro serbisyo ag pasilidad para sa mga pumueuyo it KIG.
