KALIBO, Aklan—Ginahinyu makaron it mga residente it Brgy. Pagsanjan, Banga sa pamunuan it andang barangay council nga ayuson ro mga streetlights sa andang barangay.
Sangka residente ro nag-post it anang concern sa social media account nga nagpahayag nga mabahoe nga bulig ro mahayag ag maayos nga streetlights sa mga karsadahon agud nga malikawan ro disgrasya sa mga motorista.
Gin-kwestiyon man kara ro kawad-an it aksyon it andang barangay official ag barangay electrician.
Pilang adlaw eon sigon nanda nga nataeupangdan nga owa nagahayag ro mga iwag.
Angot kara, depensa ni Punong Barangay Florido Rubrico it Pagsanjan, Banga nga sambilog eamang ro andang lisensiyadong barangay electrician.
Ginpasiguro kara nga sa Sabado hay gin-schedule nanda ro pag-ayos sa mga ginareklamong samad nga streetlights.
Ginpahayag dugang nga may ginpromisa man si Banga vice mayor Erlinda Maming nga P150,000 pesos nga pondo para sa maintenance it andang streetlights, apang owa pa naka abot ro nasambit nga pondo nga ginaeauman nga maitau makaron nga dag-on.
