Ginpasakaan eun it kaso ro prime suspect ag ro anang kakuntsaba sa natabo nga robbery hold-up sa Dumga, Makato ku Abril 27 nga pumatay sa biktima nga si Jan Andrei Bolido, 24 anyos, residente it Brgy. Tamalagon, Tangalan ag nagatrabaho bilang quality assurance it J&T Express.
Pahayag ni P/Msgt. Roel Montoya it Makato Municipal Police Station nga robbery with homicide ro kaso it suspek sa Prosecutors Office sa Kalibo.
Paathag nana nga nabuhayan ro pagpasaka bangud nga sensitibo ro kaso ag nagpa’idaeom pa sa case build up agud nga sigo ro igapresentar nga mga kaso kaibahan ro pagpresenta it mga witnesses.
Dugang nana nga mag’euwas sa mga nauna nga ebidensiya may mga habueo man sanda nga mga CCTV footage.
Samtang, ro prime suspect nga nauna eun nga nakulong bangud sa droga hay uwa nakapyansa ag sa prisuhan hasta makaron.
Presente man sa pagpasaka it kaso ro ina it biktima.
Nahueog sa regular filing ro kaso rason nga hueaton anay nga makasabat ro mga suspek kontra sa kaso kanda.
Sa pihak nga parte, at large pa ro sambilog sa mga suspek ngani uwa pa hapasakaan it kaso ag padayon nga ginaproseso ro mga pruweba kontra kana.
Ro mga witnesses sigon hay mga empleyado man ag personal nga kakilaea man it mga suspek.
Matandaan nga kat nagapaguwa halin sa andang company branch ro biktima hay ginpaeapitan raya it sangka suspek ag inagaw ro anang kwarta nga daea nga nagresulta sa pagbaril kana ag naging rason ku anang kamatayon.
