VIRAL ag gina-istoryahan it mga Indian netizens makaron ro tumaegsahon nga love story angot sa Indian YouTuber nga si Kalyan ag ro misis kara nga si Vimala.
Nagkakilaea sanda sa social media daywang dag-on eon ro nagtaliwan.
Nag-umpisa sanda bilang mag amigo ag ko ulihi hay naging mag-asawa.
Sumikat ag nakaangkon it maabu nga followers ag subscribers ro mag-asawang Kalyan ag Vimala bangud sa mga video content nga gina-post nanda angot sa andang kabuhi nga mag-asawa.
Matapos ro pilang dag-on nga pag-iba, nataeupangdan ni Vimala nga nag-eamig ro anang mister kana umpisa nga magsaylo sa andang lugar si Nitya Sree nga sambilog man nga YouTuber ag social media influencer.
Mas pang nagduda si Vimala kat masayuran nana nga ex-girlfriend ni Kalyan si Nitya.
Kat mapamatud-an ni Vimala nga nagkabalikan sanday Kalyan ag Nitya, nakibot imaw sa hinyu it mga raya kana nga pasugtan sanda nga magpakasae.
Mag-eowas kara, naghinyu man ro magkalaguyo nga maga-iba sanda nga tatlo sa sangka baeay.
Ginpag-isipan it mayad ni Vimala ag nagpasugot imaw sa gusto it anang mister ag kabit kara.
Mag-eowas sa pagtau it bendisyon, si Vimala man ro nag-coordinate it bilog nga wedding ceremony.
Si Vimala ro nagpa-book sa templo kun sa siin pagahiwaton ro kasae, imaw man ro nag-usoy it igasuksok it bride ag imaw man ro naghinyu sa caterer.
Sa mismong adlaw it kasae, nag attend man si Vimala ag kaibahan pa imaw sa wedding picture.
Nagkaeain-eain nga komento ro nabaton it tatlo sa social media, kaabuan hay pagpangbatikos sa mister ag ro iba hay kaeo-oy ag pagdayaw sa martir nga misis nga si Vimala.
