KALIBO, Aklan—Nagpangayo it pasaylo ro Metro Kalibo Water District ukon MKWD sa andang mga miyembro konsumidor engkaso nga maka experiensiya it mahinay ukon low water pressure umpisa alas-6 sa agahon hasta alas 2 it hapon.
Raya hay matapos ro kontrobersiya nga natabu kun sa siin ginbaeabagan ukon gintambakan sigon it sangka indibidwal ro aeagyan it tubi it andang sambilog nga water source nga nagahalin sa Aklan river.
Suno kay MKWD public information officer Frederick Buenavidez nga agud nga maresolbar ro nasambit nga problema, nagpadaea it sueat ro MKWD sa sangguniang bayan para sa sangka legislative inquiry.
Gusto it MKWD nga maimbestigahan ro insidente agud nga makapasaka it nagakaigo nga reklamo bangud nga mabahoe sigon nga portion it andang operasyon ro naapektuhan.
Partikular nga naapektuhan it insidente ro mga member consumer halin sa Kalibo ag New Washington.
Kadungan kara, gin engganyo nanda ro mga pumueuyu nga magtipon it tubi bilang preparasyon kon mahina ro supply it tubi kamana man nga ginpasiguro it taeatapan nga naga doble kayod sanda agud nga maresolba ro isyu sa mas madali nga tiempo ag maibalik sa normal ro andang normal.
Nasayuran nga naexperiensiyahan ro problema kato pang Mayo 26, 2023.
Nagpadaea eon man sigon sanda it sueat sa national office angot sa nagakaigo nga tikang sa problema.
