Umabot sa 870 tonelada it mga basura ro nahakot it mga tawuhan it Metropolitan Manila Development Authority (MMDA) sa Metro Manila kasunod it maeapnagong pagbaha nga tuga it supertyphoon Carina ag Hanging Habagat.
Ro nasambit nga volume suno kay MMDA Acting Chairman Romando Artes hay ginaeauman nga kapin pang magataas bangud sa nagapadayon pa ro ginahimo nga clearing operations ag may mga lugar pang nagakinahang-ean it mahaba-habang paglimpyo.
Kaabuan sa mga nasambit nga basura ro naitambak sa mga karsada drainage, pampublikong lugar, ag iba pang inabot it tubi-baha.
Napuno man it eapok ro pilang lugar bangud sa pag-eapaw it mga kasubaan nga nagdaea it mga madamoe nga eapok.
Samtang, sa tunga it clearing operations hay nakatutok sigon ro MMDA sa pagsaayos sa Malabon-Navotas River Navigational Gate nga naging rason agud nga maeomos sa tubi baha ag tubi-alat ro maabong komunidad sa nasambit nga lugar.
