TANGALAN, Aklan — Patay ro sangka 58-anyos nga motorcycle rider kaibahan ro anang 48-anyos nga live-in partner nga angkas matapos mabungguan it sangka van maeapit sa Diversion Road sa Barangay Tondog, Tangalan, Aklan bandang alas-5:50 it agahon it Miyerkules, Hulyo 1, 2026.
Base sa imbestigasyon, gina-alegar nga nag-overtake ro 52 anyos nga driver it van sa daywang saeakyan ag ulihi eon nana napan-uhan ro nagapaliko nga motorsiklo sa Diversion Road rason nga nabungguan raya.
Insigidang gindaea it rumespondeng katapo it Tangalan MDRRMO ag Bureau of Fire Protection ro mga biktima sa Dr. Rafael S. Tumbokon Memorial Hospital, apang parehong gindeklarang dead on arrival it nagtatap nga doktor.
Gindakop it kapulisan ro driver it van nga residente it Brgy. Bulwang, Numancia ag gindaea sa Tangalan Municipal Police Station nga nagapangatubang sa reklamong reckless imprudence resulting in homicide and damage to property.
Nasayuran nga ro mga biktima hay parehong residente it nasambit nga banwa.
Nagapadayun pa ro imbestigasyon it kapulisan sa insidente.
