KALIBO, Aklan—Gusto nga pamatud-an ni Mr. Ronald Reloj, secretary it Aklan Quarry Association ro naging sabat ni Punong Barangay Sofronio Bunyog it Polo, Banga nga prebilihiyo sigon kara nga magbaton it maskin anu maghalin sa quarry operator kabaylo it pabor nga anang ginatao.
Raya nga sabat sigon it kapitan hay natabo sa open forum sa ginpatigayon nga barangay assembly ko nagtaliwan nga Marso 11.
Klaro suno kay Reloj nga bayolasyon raya sa nagairal nga polisiya partikular ro “No gift policy” sa mga government employees kamana man hayagan sigon nga pag-eabag sa naga-eksister nga laye partikular ro graft and corruption.
Una kara, nakabaton sigon imaw it reklamo maghalin sa anang member apang uwa anay nana pagtaw-i it igtaeopangod hasta nga nakaabot sa barangay assembly ag dikato direkta nga ginkutana ro opisyal.
Maabo pa sigon kunta sandang kutana apang gintapos eon ro pueong rason nga nagdesisyon sanda nga ipaabot eon lang ro reklamo sa Ombudsman.
Ginpamalibaran man ni Mr. Reloj nga may eamod pamulitika ro nasambit nga isyu bangud nga maeayo pa ro eleksyon ag gusto malang nana nga pamatud-an ag maklaruhan sa naging sabat it kapitan.
Madumduman nga ginpanginwaea ni kapitan Bunyog ro akusasyon kanda nanday Romualdo Zeque ag Mr. Reloj ag maisog sigon nana raya nga atubadngon bangud nga maskin bakod hay uwa imaw it gina-corrupt sa pondo it barangay kaparehas sa ginahaboy kana nga nagapangotong imaw it P30,000 hasta it P70,000 pesos kada buean.
Ginpahayag dugang nga uwa imaw it ginaobra nga kabalastugan sa barangay ag uwa imaw it ginatapakan nga tawo.
