KALIBO, Aklan—Nag-abot sa kabilugan nga 1.7 milyon nga turista ro nagbakasyon sa Isla it Boracay ko 2022.
Base sa record it Malay Tourism Office, pinakamaabung turistang nagbisita hay ro buean it Mayo nga nag-abot sa 201,368 ag pinakamanaba ko Enero nga kapin sa 35,799.
Kaeabanan sa tourist arrivals hay puro domestic tourists nga ginsundan it mga foreign tourists ag overseas Filipino workers.
Suno kay Jetty Port administrator Esel Flores, umpisa Disyembre 25 hasta makaron nga Enero hay naga-average ro daily tourist arrivals sa 5,500 hasta 6,000 nga nakasueod sa maximum carrying capacity it Boracay nga 6,400.
Grabe suno kana ro pagbuhos it mga bisita ko paskwa, apang ko Enero 1 kat nagka-aberya ro mga flights sa Ninoy Aquino International Airport bangud sa isyung teknikal hay sobrang bumagsak ro bisita sa 2,500.
Samtang, gindugang pa ni Flores nga libu-libong turista ag residente ro dumagsa sa Boracay, kun sa siin napa-wow sanda sa ginpatigayon nga fireworks display sa pagsug-aeaw sa Bag-ong Dag-on nga gin-sponsor it Boracay Foundation Incorporated (BFI) nga nagbuhay it haeos 20 minutos.
Raya ro kauna-unahan umpisa ko 2018 nga uman nga ginpasugtan it gobyerno ro dag-unan nga fireworks display nga gina-abangan it kaabung nagadayo sa sikat nga beach destination.
Ginpapundo ro fireworks display it Duterte administration matapos ro ginpatigayon nga rehabilitasyon sa isla.
