KALIBO, Aklan—“Kahugod, tiyaga, dedikasyon ag pangamuyo”.
Raya suno kay 2nd Lt. Joebel Quincio ro anang sekretong ingrediente sa pag-eaha ku anang kadaeag-an sa kabuhi.
Si Quinicio hay tubong Brgy. Morales, Balete, Aklan ag naga- isaeahanong Aklanon nga maswerteng napaeakip sa 261 MABALASIK (Mandirigma ng Bayan Lakas at Sarili Iaalay para sa Kapayapaan) Class 2019 graduates it Philippine Military Academy (PMA).
Pahayag ni 2nd Lt. Quincio, sa pag-eaha it anang kadaeag-an hay gindugangan nana raya it pasensiya rason nga sa makaron hay nasamitan eon kara ro minatuod-tuod nga kadaeag-an sa pihak nga bukon it madali ro anang “journey” gin-agihan sa sueod it ap-at nga dag-on sa PMA.
Bukon eamang sigon it hinampang raya it utak kundi kinahang-ean nga balansehon ro iba pang aspeto it anang pagkatawo
Samtang, ginpili ni Quinicio nga sumueod sa Philippine Air Force.
Suno kana, gusto sigon kara nga magdaea it eroplano ukon helicopter eabi eon sa mga relief operations.
Eubos man ro pagpasaeamat kara sa Ginuo, sa anang pamilya ag sa tanan nga nangin kaparte it anang kabuhi nga naging inspirasyon ag nagtao kana it giya.
Sa pihak nga parte, nagpahayag it pagpabor sa House Bill 8961 ukon Mandatory Reserved Officer Training Corps (ROTC) si 2nd Lt. Quinicio.
Sa makaron suno kana nga henerasyon, kinahang-ean nga mapaidaeom ro mga pamatan-on sa kaparehas kara nga training agod nga mas pa nga ma-develop ro andang disiplina sa kaugalingon, ma-enhance ro self-confidence ag maipakita ro andang pagpalangga sa nasyon.
