Padayun nga ginagamit it pilang motorista ro sangka tulay sa rehiyon it Thessaly, Greece maskin nga nahugos eon raya matapos ro pagpanaeasa it Storm Daniel ko Setyembre 2023.
Sambilog ro Palaiopyrgos Bridge sa 79 nga tulay nga nasamad sa maeapnagon nga pagbaha. Importante ro tulay bangud nga nagasugpon raya sa mga munisipalidad it Tempi ag Agia, apang nagapabilin nga peligroso ro pagtabok kara bangud nga nahugos eon ro tunga nga parte it istraktura ag haeos nagasagyad eon sa tubi it Pineios River.
Sa pihak it pagbawae, may mga motorista sa gihapon nga nagatabok sa tulay bangud nga mas mahaba ro alternatibong ruta nga nagakinahangean it dugang nga oras ag gasolina. Sa drone footage nga ginpaguwa it Larissanet Daily Newspaper, makitang dahan-dahan nga naga-agi ro sangka pickup truck sa nasamad nga tulay agud nga makatabok.
Suno sa report, nakadugang pa sa problema ro pilang navigation apps nga padayun nga nagaturo sa mga motorista sa nasambit ngta ruta, rason nga nagataeang ro pilang motorista ag isugae ro andang kaeowasan sa pagtabok sa bumagsak nga tulay.
