KALIBO, Aklan—Nag-apela ro Nalook, Pook, Caano, Estancia small farmers and home owners association ukon NAPOCACIA kay Kalibo mayor Juris Sucro nga makipagpueong eon kanda agud nga maaksyunan ro mabuhay eon nanda nga problema.
Suno kay Herman Baltazar, presidente it NAPOCACIA nga naka-tatlong sueat eon sanda kay mayor Sucro umpisa ko Disyembre it nagtaliwan nga dag-on, apang owa pa sanda nakabaton it sabat halin sa anang taeatapan.
Raya hay kasunod it pagpirma ni mayor Sucro it memorandum of understanding ukon MOA sa tunga it Department of Transportation ukon DOTr nga kanda iga-download ro pondo nga kapin sa P250 milyon pesos para sa relocation it mga residente nga maapektuhan it expansion project it Kalibo International Airport.
Mag-eowas kara, gin-kwestiyon man it grupo ro napabalita nga iga-bidding eon ro housing project sa maabot nga Marso 27 it makaron nga dag-on nga nakataeana para sa mga apektadong residente.
Ginpahayag ni Baltazar nga ham-an nga nakaangkon it nasambit nga tikang sa pihak nga owa pa nakabilog ro LGU-Kalibo ag iba pang natungdan nga ahensiya it gobyerno it resettlement action plan.
Tuyo sigon it nasambit plano nga makaangkon anay it survey agud nga mahuyap ro mga apektadong pamilya para sa relocation.
Mabahoe man sigon ro andang pagpati nga may nagasoesoe sa alkalde rason nga owa pa raya naga-atubang kanda.
Engkaso nga indi mataw-an it aksyon, plano it grupo nga magdangop sa iba pang ahensiya it gobyerno.
