KALIBO, Aklan—Ginhangaan ro katamparan ni New Zealand Prime Minister Jacinda Arden kasunod sa anang anunsyo nga magapanaog raya sa anang pwesto sa Pebrero 7 antes pa man ro igapatigayon nga election sa buean it Oktobre bangud nga inde eon nana masarangan ro trabaho.
Suno kay Bombo International Correspondent Janryll Fernandez it New Zealand, nagnaba ro popularidad it Arden bangud nga may mga campaign promises ro anang grupo nga uwa natuman ag may mga ginaduso nga polisiya nga ginapatuman nga uwa nailaan it publiko.
Ginakabig sigon it opisyal nga sangka prebilihiyo ag mabahoe nga hangkat ro pagserbe sa nasyon ag naubusan eon imaw it kabaskog para ipadayon pa ro anang trabaho.
Dag-on 2017 kat mailihir si Arden sa edad nga 37 nga imaw man ro pangatlong babayeng lider it nasyon ag sambilog sa pinakabatang lider sa bilog nga kalibutan.
Napili it Labour Party nga ibueos kana si Chris Hipkins.
Ro 44-anyos nga si Hipkins hay unang nailihir sa Labour Party ko 2008.
Imaw man ro presenteng minister of police, education and public service kamana man ro leader it House.//
