KALIBO, Aklan—Naga apela ro New Washington Tricycle Operators and Drivers Association sa mga pampasaherong tricycle it banwa it Kalibo nga indi magpang-agaw it pasahero sa sueod it andang rota.
Raya ro ginpahayag ni NEWTODA president Ericson Estanislao matapos nga mataeupangdan nga naga-pick-up it pasahero ro mga nagasueod nga tricycle it Kalibo sa andang teritoryo.
Ro maeain pa sigon hay sanda pa ro maisog kon andang ginasita.
Nagakabaeaka man imaw nga posibleng paga-ugatan ro insidente it mainitan nga diskusyon nga maga resulta sa komosyon.
Gindugang pa ni Estanislao nga mabuhay eon raya nga problema, apang owa nataw-an it nagakaigo nga aksyon.
Nagaeaum sanda nga sa idaeum it administrasyon ni mayor Jessica Panambo hay matutukan ro nasambit nga isyu.
Nasayuran nga nakaangkon it kasugtanan nga ginapasugtan ro mga pampasaherong tricycle halin sa Kalibo nga gina-arkila nga magsueod sa banwa it New Washington, apang bawae nga mag-pick-up it pasahero pabalik sa Kalibo.
