Ginbasura eon it Office of the Ombudsman ro mga administrative charges kuntra kay dating Department of Health (DOH) Sectretary Francisco Duque III angot sa mga kwestyunableng pagbakae it mga Covid-19 supplies ag Covid kits nga nagabalor it P41 billion ko dag-ong 2020.
Ro mga kasong grave misconduct, conduct prejudicial to the best interest of the service ag gross neglect of duty nga ginpapanaog kay Duque ko Agosto makarong dag-on hay personal eon nga na-dismiss.
Raya hay matapos nga paburan it Ombudsman ro motion for reconsideration ni Duque nga nauna eon nga gin papanaugan it ahensya nga guilty ro dating opisyal ag sambilog pang kaibahan nga akusado kara ko Mayo 6.
Bangod kara hay diriktang napahalin sa pwesto si Duque bilang DOH Secretary. Imaw man hay ginbue-an it mga retirement benefits ag perpetually disqualified sa maskin ano nga government positions o trabaho.
Samtang, ko rayang Agosto 5 hay nagpasugot ro Ombudsman nga indi eon imaw mahimo nga maging subject it administrative complaints bangod sa mabuhay eon nga tapos ro termino kara bilang sekretaryo it ahensya.
