Omicron XL nakasueod eon sa South Korea

Matapos madiskubre sa Britanya, nakasueod eon man sa South Korea ro unang kaso it Omicron recombinant variant nga XL.

Ginkumpirma it Korea Disease Control and Prevention Agency (KDCA) nga sangka pasyente ro may una nga XL variant, nga nag-positibo ko Marso 23.

Ro nasambit nga pasyente hay naturukan eon it third dose, owa it travel history ag nagpakita eamang it mild symptoms it COVID-19.

Sambilog ro XL sa 17 kombinasyon it daywang sublineages it Omicron nga BA.1 ag BA.2.

Nagapatigayun eon it Whole Genomic Sequencing ro KDCA agud nga matumod kung may una pang ibang XL carrier sa nasyon.