KALIBO, Aklan—Nagdangop sa sanitation department it lokal nga gobyerno it Kalibo si punong barangay Daisy Andrade it Estancia, Kalibo agud nga hinyu-on ro pag-usisa sa operasyon it talipapa sa andang lugar.
Raya hay kasunod it reklamo it pilang mga residente sa bukon it tama nga pagpilak it basura it mga vendors ag ro mga hinugas hay owa gina-deretso sa drainage rason nga nagatuga it pag stagnant it tubi nga nagaresulta sa mabaho ag maeangsa nga hugum.
Mag-eowas kara, ginahinyu man ro pagbutang it tabon sa andang mga baligya partikular ro mga karne, isda, tinuea ag iba pa agud nga indi ma expose sa mga alikabok halin sa mga naga agi nga saeakyan sa national highway ag ro pagdapo it mga insekto nga makabig nga peligroso sa ikamayad nga eawas it mga bumaeakae ag mga nagabaligya.
Gindugang pa ni Andrade nga owa man naga instrikto ro konseho basta nga makipagbueuligan eang.
Sigidas man suno kana ro paglibot it andang mga kagawad nga in-charge sa sanitation, health, peace and order, environmental ag iba pang natungdan agud nga magtau it padumdum.
Nagpaanman man ro opisyal nga posibleng indi ma renew ro health card it mga vendors kon indi magsunod sa patakaran.
