Umarangkada eon ro boeotohan it mga Pinoy sa nagkaeain-eain nga nasyon.
Kapareho it ginaeauman, indi malikawan nga makaangkon it aberya.
Sa Hong Kong, naging “chaotic and disorganized” sigon ro unang adlaw it overseas voting para sa 2022 elections.
Base sa report, may mga voting precinct sa Hong Kong ro owa sigon nakapag-accommodate it mga botante ag bangud nga sambilog sa kondisyon it gobyerno it Hong Kong hay ro hugut nga pagsunod sa anti-pandemic measures eabi eon ag naka-experiensiya idtu it ikalimang wave it surge it COVID-19 cases, ginpa-uli anay ro ibang Pinoy rason nga owa nakaboto.
Apela it konsulada sa mga Pinoy, mag-agto sa ibang adlaw agud nga malikawan ro pagdueutdutan.
Ro overseas voting hay magabuhay hasta sa Mayo 9 pa, mahaba-haba pa ro tiempo.
Samtang, sa Singapore man, sangka botante ro nag-post online ag ginasugid nga ‘pre-shaded’ eon sigon ro anang nabaton nga balota.
Bagay nga insigida man nga ginklaru it Comelec.
Ginpaathag nanda nga kon ginatau eon ro balota, magapirma ro botante nga pamatuod nga owa it isyu sa anang nabaton, malimpyo ag owa it shade.
Kon makita it botante nga shaded, indi eon dapat nga batunon ro balota.
Kadungan kara, ginpadumdum it ahensiya nga maging madahan ag likawan nga pagahalinan it ‘fake news’.
Kumbaga, think before you click.
Masyadong masangag ro eleksyon makaron nga dag-on.
Mainit ro bakbakan, indi puwedeng makaeusot ro saea nga impormasyon nga puwedeng magresulta sa gulo.
Sagrado ro botohan, nakasandig kara ro atong paeaabuton.
Indi naton nga pagpasugtan nga mamanchahan it anumang anomaliya ag kaeainan.
