Nagpaandam ro World Health Organization (WHO) nga posibleng makaangkon it surge it COVID pagkatapos it semana santa ag election.
Rason nga ginapadumdum sa pumueuyu nga magdahan ag magsunod sa health protocols.
Nagpadumdum ro WHO sa mga balikbayan ag mga maga-uli sa probinsiya nga pirmeng magsuksok it face mask ag magpa-booster shot.
Makarondaya man ro ginhambae it Department of Health, OCTA Research ag mga health experts.
Sa kaabuon it mga nag-uli sa probinsiya para dumdumon ro Semana Santa, posibleng magkalhit it uman ag ro virus.
Ginakabaeak-an man ro campaign rallies it mga kandidato nga makaron hay todo eon.
Sambilog sa mga dapat nga obrahon makaron hay ro pagpabakuna agud nga may proteksyon ro pumueuyu.
Kinahangean man nga magamit ro mga bakuna nga madali eon lang nga ma-expired.
Suno sa report, maga-expired sa Hunyo ro mga bakuna.
Indi dapat nga mauyang ro mga bakuna nga ginbakae it gobyerno.
Nauna eon nga ginhambae it Department of Health (DOH) nga iga-donate sa Myanmar ro mga maga-expired nga bakuna agud nga indi man mauyang.
Apang suno sa health experts, tinguhaan nga mabakunahan anay ro mga Pilipino bago mag-donate.
Mag-obra it pamaagi nga ro mga owa pa nabakunahan hay maturukan agud nga may proteksiyon sa COVID-19.
Maskin nga nagapanaba eon ro kaso it COVID, dapat gihapon nga ipursigi ro pagbakuna.
Ginmandu eon ni President Duterte nga obrahon nga baeay-baeay ro pagbakuna.
Sa raya nga pamaagi hay maabu sigon ro mabakunahan.
Mas mayad sigon kon mapatigayon ro house-to-house vaccination.
Iprayoridad ro mga residenteng sa maeayo nga lugar.
Idtu daehon ro mga bakuna nga maeapit nga maga-expire.
Magtaeana it national vaccination days agud nga maabu ro maturukan.
Obrahon raya antes pa nga matabu ro pag abu it kaso kapareho it paandam it WHO.
