NATIONAL News — Ginklaru it Philippine Coast Guard (PCG) nga owa sanda nag-atras sa Escoda Shoal, nga kilaea man sa tawag nga Sabina Shoal, bangud nga ro BRP Teresa Magbanua hay nagbalik eamang sa Palawan bangud sa bukon it manami nga kondisyon it paniempo ag ubos eon ro suplay it pagkaon.
Suno kay PCG Commandant Admiral Ronnie Gil Gavan, owa nag-withdraw ukon umatras ro pwersa it Pilipinas sa Escoda Shoal nga una sa sueod it 200-nautical mile exclusive economic zone (EEZ) it nasyon sa idaeum it 1982 United Nations Convention on the Law of the Sea.
Ro barko hay ginpadaea sa Escoda Shoal ko Abril hay nag-abot sa Puerto Princesa Port sa Palawan pasado ala-1 it hapon it Domingo, Setyembre 15, kapareho it gin-rekomenda ni Gavan sa National Maritime Council (NMC).
Ginsug-aeaw ni Gavan, kaibahan ro Palawan Coast Guard district commander nga si Capt. Dennis Labay, ag ro tagapaghambae it PCG para sa West Philippine Sea Commodore Jay Tariella sa pier ro 63 nga kaeaeakin-an ag kababayin-an it barko nga nag-antus sa limitadong suplay sa sueod it limang buean nga deployment sa gina-agawan nga teritoryo.
Pila sa mga raya hay may sakit ag insigidang gindaea sa Coast Guard Dispensary para sa paunang check-up.
Ap-at man ro naka-dextrose ag gindaea sa ospital bangud sa dehydration pinaagi sa ambulansyang nagahueat sa pier.
Ro nabilin nga mga tripulante hay ginpangaeanan sa sangka tradisyunal nga boodle fight nga ginpatigayon sa sueod it hangar it barko.
Ginasugid nga napilitan sanda nga magkaon it linugaw sa sueod it tatlong domingo ag naubos ro andang suplay nga pagkaon daywang adlaw antes ro andang pagbalik.
Naubusan man sanda it tubi nga mainom.
Suno kay Gavan, ro boodle fight hay selebrasyon sa madinaeag-on nga pagbalik it barko sa Palawan.
Ko Domingo hay nagpaguwa man ro China it sangka pahayag nga ro andangt ginhimo kontra sa saeakyang pandagat it Pilipinas hay sandig sa laye.
Madumduman nga pauman-uman nga ginpapundo it mga pwersa it China ro pagtinguha it mga Pilipino nga magdaea it supply sa PCG vessel umpisa nga raya hay gin-assign sa Sabina Shoal agud nga baeabagan ro pagtinguha it China nga angkunon ro lugar.
