KALIBO, Aklan — Mabahoe ro posibilidad nga mapatuman ro rekomendasyon it House Committee on Appropriations nga bawasan it P1.3 bilyon ro ginapangayo nga P2.037 bilyon nga budget it Office of the Vice President para sa masunod nga dag-on.
Suno kay dating provincial board member ag political analyst sa Aklan nga si Atty. Harry Sucgang nga raya hay bangud sa nahimo nga bayolasyon ni Vice President Sara Duterte-Carpio kun sa siin napas-eawan raya nga mapaathag sa Commission on Audit (COA) kon siin gingastos ro kapin sa P125 milyon nga confidential funds ko 2022 sa sueod eamang it 11 diyas.
May gahum suno kana ro Kongreso partikular ro House Committee on Appropriations sa pagdesisyon kon pilang pondo ro igatau sa natungdan nga departamento.
Samtang, ginpahayag pa ni Atty. Sucgang nga makabig nga irresponsabli ro naging pahayag ni VP Sara nga indi nanda kinahangean ro budget bangud nga maka-operate ro anang taeatapan maskin nga owa it pondo halin sa gobyerno.
Ro kada opisina sigon hay nagakinahangean it budget agud nga ipang-sweldo sa anang staff ag iba pang kinahangeanon agud nga magpadayun ro anang operasyon.
Sa pihak nga parte, ro pinal nga desisyon sigon sa pag-apruba it budget it Office of the Vice President hay sa alima eon it House Plenary.
Matapos nga pamatian it komite ro budget deliberations sa mga ahensya it gobyerno hay igapaidaeum raya sa plenaryo nga imaw ro pinal nga maga-apruba sa P6.352-trillion 2025 national budget.
