KALIBO, Aklan—Ginklaru it barangay council it Navitas, Numancia nga ginapasugtan ro pagdaea it mga karneng baboy sa mga baybayon nga andang nasakupan para sa nagahilapit nga selebrasyon it kapistahan ni San Juan de Bautista.
Suno kay punong barangay Franny Reyes nga ginaeauman nanda nga mas maabu makaron ro maga-excursion pagkatapos it haeos daywang dag-on nga pagpanaeasa it covid 19 pandemic kun sa siin indi malikawan ro pagdaea it mga baboy eaha man ukon hilaw sa pihak it pagtuhaw it ASF outbreak sa probinsiya.
Samtang, ko nagtaliwan nga adlaw suno kana hay nagpagtigayon sanda it special meeting kaibahan ro Philippine Coast Guard, Barangay Peacekeeping Action Team ukon BPAT ag mga cottages owners sa pagplastar it mga patakaran agud nga maprotektahan ro seguridad it mga beachgoers.
Nakataeana man sanda nga magapanupod it mga flyers bilang guide sa mga igapatuman nga safety protocols.
Pila sa mga raya hay ro pagbantay sa mga unga nga nagapaligos, pagbawae sa pagdaea it mga hinganiban ag baril kamana man ro paglimita sa ginadaea nga mga makahieilong nga ilimnon.
Samtang, gina-obliga man ro mga tag-ana it cottages nga magbutang it boya agud nga malikawan nga maka-agto sa madaeum nga portion it baybay eabi eon ro mga bukon it familiar sa lugar.
Raya hay bangud nga kantilado ro pilang parte it baybay nga delikado sa mga nagapaligos.
