KALIBO, Aklan — Owa it foul play sa pagkamatay it 43 anyos nga eaeaki nga nasapwan nga owa eon it kabuhi sa sueod it anang unit sa pabahay sa Brgy. Jugas sa banwa it New Washington, bandang alas-9:00 it gabi-i it Lunes, Enero 19.
Ro biktima hay sangka 43 anyos nga eaeaki, owa it asawa ag residente it Sitio Ilaya, Brgy. Jugas, New Washington, apang presenting naga-istar sa nasambit nga lugar.
Suno kay P/Lt. Gerwin Eulalio, deputy chief of police it New Washington Municipal Police station nga ginapatihan nga natural death ro natabu sa biktima matapos nga atakehon it anang sakit nga hapo nga naging rason it anang kamatayon .
Dugang pa nga sa pag-usisa sa anang eawas hay owa raya nakitaan it anuman nga lastro.
Ginasugid nga nangawa ro anang mga kaeapitbaeay matapos nga owa nanda raya nakita nga nagguwa sa anang baeay ag sa andang paglingling sa bintana hay nakita nga nagahamyangon raya maeapit sa andang main door.
Nasayuran nga naga-isaeanhon eamang imaw nga naga-istar sa anang unit.
