Nagpaandam ro mga eksperto sa HIV/AIDS nga nabubutang sa peligro ro pangkalibutanong kampanya kontra sa HIV bangud sa mabahoe nga pagnaba it pondo para sa programa ku 2025.
Base sa report it UNAIDS, nagnaba it 18 porsyento ro international financing para sa HIV sa mga naga-umwad nga nasyon ku nagtaliwan nga dag-on, samtang naga-isot man ro ambag it mga nasyong Europeo.
Sa pihak kara, nagapabilin nga pinakamabahoe nga donor ro Estados Unidos, samtang sangkiri nga naga-taas ro domestic funding it mga nasyong may mataas nga kaso it HIV.
Ginpakita man sa report nga sa pihak nga nalista ro pinakamanabang numero it mga bag-ong kaso it HIV ag pagkamatay bangud sa AIDS sa sueod it masobra 30 anyos, tumaas ro bag-ong impeksyon sa 21 nasyon ag haeos katunga it mga inungang may HIV ro uwa nakabaton it ginakinahangean nga antiretroviral treatment.
Padayon man ro panawagan nga ubrahong mas masarangan sa buesa ag mas madaling mabuoe ro mga bag-ong bueong kontra sa HIV para maabot ro tuyo it United Nations nga wakasan ro AIDS bilang paeag sa ikamayad nga eawas it publiko pag-abot it 2030.
