Pabor si Bryan Rey Solano, tagapaghambae it Department of Education ukon DepEd-Malay ag School Head it Nabaoy Elementary School nga ipaiway anay ro pag-angkon it mga extra-curricular activities agud nga taw-an it daean ro pagfocus it mga estudyante sa andang mga leksyon.
Suno kana nga sa kamatuoran hay mabuhay eon raya nga naga-eksister nga mandu matapos nga ginbayluhan it DepEd ro dating Department of Education, Culture and Sports ukon DECS kun sa siin ginseparar ro culture and sports.
Sa pihak kara, ginahueat nanda ro igapaguwa nga sueundanan it ahensiya angot sa mga aktibidad nga pagapasugtan sa mga eskwelahan makaron nga school year.
Base sa DepEd Order No. 34 series of 2022, ginmandu ni Vice President ag Education Secretary Sara Duterte ro pagbawae anay sa mga extra-curricular activities makaron nga dag-on kadungan ro pagpadumdum sa mga manugturo nga tutukan anay ro academics agud nga maka-eagas sa learning losses bangud sa pandemya.
Dugang pa kara nga makaron nga dag-on hay owa anay it Palarong Pambansa.
Nagapati man si Solano nga indi maka-apekto ro mandu sa development it sangka estudyante eabi eon ro paghasa sa talent nga anang gina angkon partikular sa patag it hinampang ukon sports.
