KALIBO, Aklan — Sa pihak nga nalimitahan ro pagpakamaeo ni dating Pangueong Rodrigo Duterte sa ginpatigayon nga pagpamati it House quad committee, adlaw it Miyerkules angot sa war on drugs, apang may mga behavior sa gihapon ro dating presidente nga kinahangean nga taguon sa publiko bangud nga maabu ro nakakita.
Raya ro ginpahayag ni Atty. Harry Sucgang, sangka political analyst sa Aklan kasunod it hana nana nga pagbayo sa anang kaiping nga si dating Senador Leila de Lima ag paghaboy it mikropono kay dating Senador Antonio Trillanes IV.
Apang naging trademark eon sigon ni Duterte ro pagpakamaeo kada nagahambae kamana man ro anang pagiging genuine ukon authentic rason nga dikara imaw ginboto it mga tawo.
Madumduman nga sa pag-tambong it dating presidente sa hearing it Senado ko nagtaliwan nga domingo hay nataeupangdan ro owa it pundo kara nga pagpakamaeo samtang nagasabat sa mga pangutana ni Senador Risa Hontiveros.
Sa pihak nga parte, nagapati si Atty. Sucgang nga ro pinaka rason it anang pag-attend sa mga hearing it Senado ag Kongreso hay agud nga mabawi ro nagnaba nga rating it anang unga nga si Vice President Sara Duterte.
Sa pihak nga parte, gindugang pa ni Atty. Sucgang nga posibleng makaangkon it kinagamo engkaso nga sa Pilipinas iga-persecute si Duterte bangud sa anang mga loyalista.
Bangud kara, mas gusto sigon it gobyerno nga sa guwa it nasyon pagahimuon ro pagpamati sa anang kaso.
Nauna eon man nga ginpahayag it gobyerno nga indi sanda magapasilabot engkaso nga magsurender si Duterte sa hurisdiksyon it International Criminal Court (ICC).
