Kita sa CCTV ro daywang eaeaki nga nagpanakaw it mga manok nga pangbueang sa Barangay Mina, aga-aga it Martes, Hunyo 18, 2024.
Sa CCTV footage, makita ro daywang eaeaki nga madahan nga nagatikang sa sueod it sangka game farm, kun sa siin gintakpan ro andang mga itsura it andang suksok nga t-shirt.
Ginasugid nga nakabati pa ro tag-ana nga nagpamaeo ukon nagsangag ro anang alagang mga manok, sangka senyales nga may nagpaeapit nga tawo, apang anang ginbalewala.
Suno kay Jowelson Aguirre, caretaker ag ama it tag-ana it farm nga mabahoe ro andang pagpati nga ro daywang eaeaki nga nagpanakaw sa andang ap-at nga manok hay posibleng sanda man ro suspek sa pagkaduea it mga manok nga pangbueang sa andang kaiping nga Barangay Bagto ko nagtaliwan nga mga inadlaw, kun sa siin 17 gid tanan nga manok ro natigayon nga matakaw matapos nga ginbalik-balikan sigon raya it mga manakaw.
Posible man sigon nga kasimaryo man lang nanda ro responsable kara nga kaibahan sa sangka grupo.
Owa suno kana it kurae ro andang farm sa likod nga portion paagto sa may suba rason nga posibleng madaling nakasueod ro mga suspek.
Gin-abisuhan sigon sanda it mga awtoridad nga magpangaman ag indi basta-basta nga magguwa bangud nga posibleng armado ro mga susppek.
Samtang, owa pa it identity ukon owa pa nakilaea ro pagkatawo it mga suspek tuga it indi maitsurahan ro mga raya bangud nga posibleng nasayuran nanda nga may naka-install nga CCTV sa kaiping nga baeay it farm nga andang naging entry ag exit point.
Ro insidente hay gin-report eon sa andang barangay ag Lezo Municipal Police Station ag nagahimo makaron it nagakaigo nga aksyon.
Ro farm hay may alaga nga kapin sa 80 nga pangbueang nga manok mag-eowas pa sa andang mga ginapabuto.
Sa pihak nga parte, nagaeaum ro barangay council it mina, lezo nga mataw-an it katumanan ro andang ginahinyu nga maaprubahan eagi ro andang budget para makaron nga 2024 agud nga makataeana it pondo para sa pag-install it dugang nga mga CCTV camera sa mga estratehikong lugar sa andang barangay.
Suno kay punong barangay jowen Fernandez nga maka-alarma ro sunud-sunod nga insidente it panakawan sa andang lugar.
Mabahoe nga bulig sigon ro CCTV camera para sa monitoring ag seguridad it andang lugar.
Sa makaron hay mas pa nga ginpabaskog ro pagpatrolya it andang mga tanod ag kapulisan.
Abiso pa nana sa mga residente nga maging vigilante agud nga indi maging potensiyal nga biktima it mga kawatan.
