KALIBO, Aklan—Nagpatigayon it nagkaeain-eain nga aktibidad ro Kilusang Mamamalakaya ng Pilipinas ukon PAMALAKAYA antes pa man ro ikatlong State of the Nation Address ni Pangueong Ferdinand Marcos Jr. sa adlaw it Lunes, Hulyo 22.
Suno kay Joey Marabe it PAMALAKAYA Zambales nga nagaeaum sanda nga matalakay it presidente ro pagsolusyon sa sektor it mangingisda angot sa pagbagsak sigon sa 60% it andang kita.
Raya hay matapos nga mas naglala pa ro naeksperyensyahang tensyon makaron it mga mangingisda sa kada nagapaeapit sanda sa bahin it West Philippine Sea.
Gusto sigon nanda mabatian kon may himuon nga tikang ro gobyerno angot sa nagainabo nga presensya it mga Chinese Vessel sa nasambit nga kaeawran pati eon sa Batangas nga 40km ro kaeayuon halin sa shoreline.
Nasayuran nga nagdugang pa ro ginapatuman nga fishing ban rason nga ginatantya eon lang nga 40% ro kabilugang kita it mga raya.
Apang, sa pihak it manabang kita, mas ginapili gihapon nanda nga ipadayon ro pakikipagsapalaran sa kaeawran maskin pa ginaabuso ag ginaharass sanda it mga Tsino.
