Uwa pa nakadesisyon ro pamilya ni Celso Tesoro kon pagapasakaan it kaso ro anang manghod nga si Cerio Tesoro kasunod it stabbing incident nga nag-eontad sa Sitio Eambon, Brgy. Calangcang sa banwa it Makato bandang alas-12:00 it udtro adlaw it Lunes.
Suno kay PMSgt. James Padasas, imbestigador it Makato Municipal Police Station, nag-ayo pa sigon it oras ro pamilya agud nga maistoryahan ro insidente ag kon anu ro tama nga himuon.
Raya hay matapos nga una pa sa intensive care unit it sangka pribadong ospital ro biktima matapos nga makaangkon it daywang igo it pagbuno sa anang tiyan ag idaeom it kili-kili.
Base sa imbestigasyon it pulisya, bukon eon it bag-o ro alitan it daywa ag masami gidman ro mga raya nagadiskusyunan kapin eon kon una sa idaeom it impluwensya it aeak.
Samtang sa pihak nga parte, nagpadumdom ro pulisya sa publiko nga likawan nga istoryahan ro away-pamilya kapin eon kon nakainom it aeak ro magtimbang nga parte agud nga malikawan ro kaparehas kara nga insidente. Mas makapamayad suno kay PMSgt. Padasas nga maging mahinahon ro tanan kapin eon ag magpamilya manlang ro imbolbado.
Nasayuran nga ro alitan it daywa hay bangud sa andang ancestral house nga presenteng ginaistaran pa it andang ama.
