KALIBO, Aklan—Nagpanindugan ro pamunuan it Aklan National High School for Arts and Trades ukon AHNSAT nga owa sanda nagkueang sa pagpadumdum sa andang mga estudyante kamana man ro pagpatuman it seguridad sa sueod it andang eskwelahan.
Suno kay Richard Flores, principal it nasambit nga eskwelahan nga blangko sigon sanda sa natabu bangud nga owa man it may nagpahisayod kanda angot sa matuod-tuod nga natabu.
Sa pihak kara, ginakasubo nanda ag eubus sanda nga nagakabaeaka sa insidente maskin nga raya hay natabu sa guwa it andang eskwelahan .
Nagpanindugan man imaw nga ro andang eskwelahan hay may ginapatuman nga security protocols kaibahan ro pirmeng pag-check it andang mga gwardiya sa mga gamit it estudyante kon may daea nga mga mataeum hinganiban ukon armas sa pagsueod sa andang campus gamit ro mga metal detector.
Sa pihak nga parte, ginmanduan man nana ro anang mga manugturo nga ipatawag ro ginikanan it mga estudyante nga involved para sa sangka komperensiya agud nga makabilog it win-win solution ag makatipon it nagakaigo nga impormasyon sa natabu nga insidente.
Paga-imbestigahan man sigon nanda ro involvement it pila sa andang mga estudyante sa mga gang war ukon grupo nga ginabak-apan it mga outsider nga kaeabanan nga nagaresulta sa gulo.
Dugang pa ni Flores nga ro tanan nga mga school related activities hay owa nanda ginapasugtan nga obrahon sa guwa it andang eskwelahan.
Base sa report, hapon it miyerkules kat matabu ro insidente sa Ilang-Ilang St. sa likod it eskwelahan samtang naga-obra it project sa eskwelahan ro mga estudyante kon sa siin gulpi eamang sigon nga nag-abot ro binatilyo nga andang schoolmate kaibahan ro anang ama nga nakasakay sa motorsiklo ag owa it karason-rason nga ginpaeukpan sanda it baril.
Ginaturo nga rason hay ro away it magtimbang nga parte sa indi masayuran nga rason.
Samtang, ginatugyan eon lang it principal sa kapulisan ro pagpatigayon it nagakaigo nga imbestigasyon .
