KALIBO, Aklan—Blangko pa ro pamunuan it sangka poultry farm angot sa pagkatawo it mga indibidwal nga posibleng nagpanakaw sa ginatantiya nga 500 bilog nga “45 days” nga manok nga nagabalor it masobra sa P75,000 sa Mc Kinley Road, Brgy. Polo New Washington.
Suno kay Maria Lee Taladro, caretaker it farm nga natukiban nanda ro pagkaduea it mga alagang manok ko nagtaliwan nga Hulyo 21 matapos nga mag-harvest ukon magkatay sanda.
Haeos “1,000 heads” sigon it manok ro ginpaalagaan it anang igmanghud nga si Maricar Taladro nga idtu naga-trabaho sa Metro Manila, apang ulihi eon nanda nataeupangdan nga haeos katunga eon ro naduea .
Mabahoe ro andang pagpati nga amat-amat ro pagtakaw sa mga manok.
Posible suno kana nga mga residente man maeapit sa lugar ro responsabli sa panakawan.
Bangud sa insidente hay nag-report sanda sa New Washington Municipal Police Station ag gina-imbestigahan eon ro natabu.
Panawagan nana sa mga suspek nga kabay nga makonsensiya bangud nga mabahoe nga kantidad ro nalugi kanda .
Nasayuran nga dati eon nga naduea-an man it haeos 70 bilog nga manok ro nasambit nga farm, apang ginbalewala eamang nanda raya rason nga posibleng naanad ro mga suspek ag sa uman nanda nga pag-alaga hay uman man nga nagbalik ro mga raya sa andang pagpanakaw.
