Pagtiis ro makabig nga kinahangean para ma-angkon ro cash assistance nga igapanupod it Department of Social welfare and Developmet Office ukon DSWD makaron nga adlaw.
Sa pangaywang kahigayunan nga pagpatigayon it DSWD sa educational cash aid payout sa may ABL Sports Complex sa may Capitol site makaron nga adlaw, kapin sa 1000 ka mga benepesyaryo ro ginaeauman.
Sambilog si Cerila Rupo, sangka ginikanan it Senior High student nga timprano paeang bugtaw eon para magpahaom sa nasambit nga payout.
Suno kay Rupo nga ala-una paeang it aga-aga hay bugtaw eon sanda it ana nga onga ag bandang 2:30 it aga-aga hay nagpila eon sa ABL sports complex para sa educational cash assistance it AICS sa idaeom it DSWD.
Apisar nga timprano eon nagpanaw, may mga nauna sa gihapon kanda sa ABL kung siin natigayon nga pangwaeo sanda sa pila.
Ginatan-aw sigon it mga pulis sa sueod it ABL kung may text confirmation sanda nga nabaton maghalin sa DSWD, ID ag gilayon nga ginataw-an it numero para sa pagpila.
Kumpara ko nagtaliwan nga sabado mas matawhay ro makaron nga payout it ayuda sa bulig eon man it digitalized system.
Dugang pa ni Rupo nga makabig nga mabahoe nga bulig eabi eon gid para kandang mga nagakalisod sa kabuhi nga ultimo pangbakae it gamit sa eskwelahan para sa andang mga onga hay nagakalisod pa nga pagabakeon.
Madumduman nga makaron nga Sabado ro pangaywang kahigayunan nga payout para sa educational assistance it DSWD ag ap-at ka Sabado eon lang ro nabilin para sa nasambit nga payout.
