Ginpahayag it Palasyo it Malakanyang ro promisang proteksyon ag kaeuwasan ni Pangueong Ferdinand “Bongbong” Marcos Jr. Sa tanan nga mga miyembro it media sa Pilipinas.
Kasunod raya it gulping pagbisita it mga pulis sa mga panimaeay it pilang mga mamamahayag nga nagtuga man it alarma ag pagkabaeaka kanda.
Suno kay Garafil, makaeaom ro mga miyembro it media nga padayon ro pagkilaea it pangueo sa importansya kara bilang sangka importanteng parte it demokrasya sa nasyon.
Suno pa kana nga “committed” si Pangueong Marcos sa pagtugyan it proteksyon ag seguridad sa hanay it mga mamamahayag sa Pilipinas para masiguro ro kaeuwasan it mga raya.
Gin-insister man kara nga para sa kaeuwasan eamang it mga raya ro tuyo it pulisya sa ginhimu nga pagbisita sa tunga raya it mainit nga kaso it pagpatay sa pila pang mga mamamahayag sa nagakeain-eain nga parte it Pilipinas.
Kung madumduman , una kara hay nagpangayo eon man it pasaylo si Interior Secretary Benhur Abalos sa tanan nga miyembro it media angot sa nasambit nga isyu kadungan it pag-insister nga haom nga insigidang magaresponde ro pulisya satyempo nga makabaton it hangkat ukon makabatyag it peligro para sa kaugalingon nga kaeuwasan ro bilog nga numero it mga mamamahayag.
