BUSINESS News —- Epektibo eon makaron nga adlaw ro ika-ap-at nga sunod nga domingo nga pagbawas sa sukot sa presyo it produktong petrolyo.
Suno sa kumpaniyang Pilipinas Shell, Petron, Seaoil Philippines, ag Chevron Philippines ukon Caltex, P1.85 ro magiging bawas-sukot sa presyo it kada litro it diesel; 40 sentimos man ro magiging bawas sa kada litro it gasolina; samtang P1.30 man ro ginbuhin sa kada litro it kerosene.
Nagpatuman man it kaparehong presyo ro kumpaniyang Petro Gazz, PTT Philippines, Phoenix Petroleum Philippines, ag Cleanfuel mag-eowas eon lang sa kerosene nga owa sanda.
Nag-umpisa ro implementasyon sa pilang kumpaniya it langis kainang alas-6 it agahon mag-eowas sa kumpaniyang Cleanfuel nga nagpatuman kaina it alas-8 it agahon ag Caltex nga nagpatuman man kainang alas-12 it tungang gabi-i.
Suno kay Department of Energy (DOE) Oil Industry Management Bureau Director Rino Abad, ro rason it bawas sa sukot sa presyo it langis hay nakabase sa anunsyo it European Central Bank (ECB) angot sa pagtaas it andang interes ag trading price.
Ginaeauman man it ahensya nga magapadayun ro pagnaba sa presyo it gasolina kun ro US Federal Reserve hay agresibong magapataas it mga rate sa andang interes nga posibleng magpahina sa aktibidad it ekonomiya ukon mas manabang demand nga magapanaba sa presyo it mga nagapangunang baeak-eon.
Sa ulihing datos it DOE ko Hulyo 19 hasta 21, ro year to date adjustments sa kada litro it diesel hay magahampang sa P73.30 hasta P81.41 samtang kapin sa P70.20 hasta P77.45 man sa kada litro it gasolina.
