Gingamit it sangka pasahero it IndiGo Airlines ro anang technology skills kat gin testingan kara nga i-hack ro website it ginsakyan nga eroplano para mausoy ro naduea nga luggage matapos raya nga aksidenteng maibaylo sa ibang bag.
Suno kay Nandan Kumar, sangka software engineer, napilitan imaw nga i-hack ro website it ginsakyan nga eroplano bangud nga owa sigon imaw ginbuligan it nasambit nga airline company agud nga mausoy ro naduea nana nga bag.
Suno kana nga pilang beses nana nga gintawagan ro airlines ag nagpangayo it bulig sa Interactive Voice Response (IVR) kara, apang nagpamalibad nga itau ro mga personal nga detalye it mga pasahero bangud sa “privacy purposes”.
Bangud sa mahinay nga pagsabat it nasambit nga kompaniya, gingamit eon ni Kumar ro anang “developer instinct” kun sa siin gin-usoy nana ro Passenger Name Record (PNR) it pasaherong nakabayluhan nana it bag.
Dugang pa kara nga pinaagi sa “F12” button it computer ag developer console, nakasueod si Kumar sa website it IndiGo Airlines, kun sa siin nausoy nana ro cellphone number ag email ID it pasaherong nakabayluhan nana it bag nga ko ulihi hay nagdesisyon nga makipagkita kana.
Gin-abisuhan ni Kumar ro IndiGo Airlines nga pabaskugon ro andang website bangud nga may mga sensitive data nga pwede sigon nga mag-leak.
Dapat man sigon nga obrahon nga user-friendly ag pro-active ro andang customer service.
Samtang, ginpahayag man it IndiGo Airlines nga hugut nga ginapatuman it andang taeatapan ro privacy policy, ag gintestingan man sigon it andang customer care agent nga mag areglo it conference call agud nga mabuligan si Kumar.
Nagpangayo man it pasaylo ro paeauparan sa mabuhay nga pagsabat it andang kompaniya.
