Nagpanindugan si President Ferdinand Marcos Jr., nga bukon it ill-gotten ro mga manggad ag propiyedad it andang pamilya.
Raya hay matapos ginbasura ro civil cases kontra sa anang pamilya matapos mapamatud-an nga bukon it halin sa maeain nga oeobrahon ukon tinakawan ro mangad it mga raya.
Raya ro pahayag it Presidente sa luncheon it Foreign Correspondents Association of the Philippines matapos imaw nga ginpangutana angot sa nasambit nga isyu.
Ginpahayag dugang nga owa eon nana nabuytan ro anang mga obligasyon bilang co-executor it estate it anang ama bangud masako eon imaw sa anang obligasyon bilang Presidente it nasyon.
Pahayag pa kara nga ginatugyan eon lang nana ro tanan nga mga kinahangeanon nga asikasuhon sa anang mga abogado.
Dugang pa kara nga bukas ro anang abogado sa pagsabat it mga pangutana angot sa nasambit nga isyu.
Nasayuran nga base sa mga record, ko 1997, nagdesisyon ro Supreme Court nga kinahangean magbayad ro pamilya ni dating President Ferdinand Marcos Sr., it kapin P23 bilyon nga estate tax.
Apang bangud owa raya nabayaran, nagbahoe pa ro kantidad bangud sa mga penalty ag interest.
Suno kay retired Supreme Court Justice Antonio Carpio, ro estate tax liability it pamilya Marcos hay naga-abot eon sa P203 bilyon.
Ro estate tax hay ro buwis nga ginapabayaran sa mga nabilin nga properties ag assets it sangka tawo pagkatapos raya nga mamatay.
