KALIBO,Aklan– Ginpaboran it pamunuan it Person’s with Disabilities Office ukon PDAO Aklan ro ginaduso nga hagna it pilang mamalidha nga himuon nga lifetime ro validity it identification card nga gina-isyu sa mga PWD’s.
Suno kay Mr. Randy Rebaldo, head it PDAO Aklan nga may mga deformity nga panghabang buhay kaparehas it may sakit nga polio, ro mga bungoe ukon apa ag maabong iba pa hay nagakinahang-ean gidman ro mga raya it lifetime nga ID.
Apang, maid-id pa sigon makaron ro pag categorize sa mga indibidwal nga may deperensya bangud nga may makabig nga pang temporaryo eamang rason nga inde man sanda pwede maisyuhan it lifetime ID.
Ro identification card hay nagapamatuod nga sanda hay rehistrado nga PWD ag may kinamatarong nga maka-avail it benepisyo ukon serbisyo.
Una kara, ko dag-on 2020 hay nagduso it hagna si Senator Lito Lapid nga maging lifetime eon ro validity ginabuytan nga ID it mga PWD’s.
Samtang ko 2022 hay may ginduso man si Senador Sonny Angara nga kaparehong hagna.
Dapat sigon nga pairalon ro “common sense” ag inde eon kinahang-ean nga i-renew ro PWD ID it mga tawong inde eon magmayad sa andang kapansanan.
Sa makaron, ro mga PWD hay kinahang-ean nga mag-renew it andang mga ID kada limang dag-on sandig sa National Council on Disability Affairs Administrative Order No. 001 series of 2021.
