KALIBO, Aklan—Masarangan mo baea nga maggastos it P1 milyon pesos agud nga makabakae it sangka pispis nga paga-obrahon mo nga pet ukon alaga.
Ginbida it pet exhibitor nga si Florante Gozon halin sa Ilocos Sur ro anang mga alaga kaibahan eon ro sangka parrot nga Hyacinth Macaw, nga umabot sa P1 milyon pesos ro haega.
Suno kay Gozon, bata pa eamang imaw hay hilig eon nana ro mag-alaga it sapat kapareho it mga isiw nga nakikita nana sa andang lugar.
Apang kat nag asenso eon ro andang kabuhi, nag-umpisa eon imaw nga abuton ro anang mga handum sa kabuhi nga makaangkon it mga manami nga pet kapareho it mga parrot.
Suno kay Gozon, masyadong manami ro kulay nga blue nga balahibo it Hyacinth Macaw, ag mas mabahoe raya kumpara sa ibang parrot.
Mag-eowas sa mga parrot, may una man imaw nga mga sugar glider nga may high mutation, ukon may kulay puti, ag bearded dragon.
Bukon man sigon it mabudlay nga mag alaga it mga bukon it ordinaryong pet animals apang kinahangean eamang ro dedikasyon.
Bangud nga mahaba man ro kabuhi it mga parrot nga naga abot sa 40 anyos, ginpahayag ni Gozon nga dapat may kakilaeang mag-alaga kanda kon owa eon it matuod nga nagapanag-iya.
