KALIBO, Aklan — Kumbinsido si Jancel Rufin Magbiro, professor sa Aklan Catholic College nga magapakita it “judicial restraint” ro Korte Suprema angot sa petisyon ni Vice President Sara Duterte nga ipapundo ro anang impeachment trial sa Senado.
Suno kana nga bilang patakaran, ro impeachment hay sangka political question rason nga magapakita it judicial restraint ro mataas nga korte.
Buot hambaeon nga indi raya magapasilabot sa proseso it impeachment.
Nasayuran nga mag-eowas sa petisyon ni VP Sara, nagdihon man it separadong petisyon nga may parehong katuyuan ro pilang abogado halin sa Mindanao nga kaalyado it anang ama nga si dating Pangueong Rodrigo Duterte.
Ro reklamo nga may pitong impeachment charges kontra sa Bise Presidente hay ginpirmahan it 215 nga miyembro it Kamara, eampas sa kinahangean nga 103 rason nga napasaka sa Senado para sa pag-trial.
Dugang pa ni Magbiro nga may mga panawagan makaron halin sa publiko para sa mga senador nga magtipon eon bilang impeachment court agud nga maumpisahan ro trial, apang gin-insister ni Senate President Francis “Chiz” Escudero nga posible pa raya nga umpisahan sa ika-20th congress sa Hulyo.
Bangud sa nagahilapit nga mid-term elections sa Mayo 12, parehong naka-recess ro mga kongresista ag senador hasta sa Hunyo 2.
Sa pihak nga parte, nagapati ro professor nga engkaso nga umpisahan eon makaron ro impeachment trial sa senado, mabahoe ro posibilidad nga mapatalsik ro bise presidente.
Raya hay bangud nga ro impeachment suno kana hay political kaysa sa legal process maskin pa nga nagasunod raya sa constitutional requirement.
Makabig sigon raya nga numbers game kun sa siin ro politika sa Pilipinas hay pirmeng partisan in nature.
