Natyempo eon para ipasarado ro mga ginreklamong piggery sa may bahin it Brgy. Andagao, Kalibo matapos ro makapilang beses nga pagta-o kanda it palugit it lokal nga gobyerno.
Suno kay Mark Sy, tagapaghambae ni Kalibo mayor Juris Sucro nga gin-implementar eamang ro executive order it alkalde kon siin gin-isyuhan it cease and desist order ro mga nasambitan nga piggery.
Mismong kaibahan ro alkalde sa nasambit nga operasyon para tumanon kara ro anang obligasyon nga mataw-an it aksyon ro reklamo ag problema it mga residente sa nasambit nga lugar.
Ginpahayag dugang ni Sy nga makapilang beses eon nga nagabinalik-balik sa barangay affairs ag mismong sa taeatapan it alkalde ro mga tagreklamo bangud nga inde eon sigon nanda matakuran ro hugom it higko it baboy.
Angot kara, magapadayon ro andang operasyon makaron nga adlaw bangud nga may piggery pa sigon nga uwa nanda naabot kahapon nga adlaw it Martes.
