KALIBO, Aklan—Nagapabilin nga paealigban sa pamilya De tomas ro pagkamatay it andang mga alagang pato sa bahin it Brgy. Palale, Banga.
Suno kay Arturo De Tomas, natabo ro pag-atake it indi pa matumod nga sapat ukon elemento sa anang mga kasapatan ko aga-aga it Sabado.
Ginapahayag nga halin sa 14 kara nga mga alaga nga pato hay 12 ro nasapwan nga patay.
Pag-istorya pa kara nga may nabatian imaw nga medyo nagakayaba bandang alas-1:00 ro pag-orason apang owa sigon nana raya gintaw-an it igtueopangod.
Apang, nakibot eon lang sigon sanda pagka-aga kat makit-an ro sitwasyon it anang mga alaga nga nagkaealhit eon ag wakwak ro leog ag likod.
Ro makangawa-ngawa suno kana hay owa gid it may nakit-an nga maskin sang tueo nga dugo sa eugta halin sa 12 ka pato nga gin-atake.
Ginasugid nga matsa ginsupsup ro tanan nga dugo it anang mga alaga kamana man nga ginbuoe ro tinae ag atay.
Raya sigon ro kauna-unahan nga kahigayunan nga naka-eksperyensya sanda it makarondayang hitabo sa sueod it 46 anyos nga pagtinir sa lugar.
Sa makaron, paealigban pa sa pamilya ro hitabo kung siin nagtuga man raya it alarma ag pagkabaeaka sa iba pa nandang kasimaryo.
