Makaeksperyensya it daywang adlaw nga power interruption ro ibang banwa sa probinsya it Aklan.
Raya hay sandig man sa anunsyo it Aklan Electric Cooperative ukon Akelco.
Suno kay Engr. Jude Ropa it Akelco, may preventive maintenance nga igapatigayon ro National Grid Corporation of the Philippines ukon NGCP nga paga-umpisahan sa adlaw it Sabado, Setyembre 17.
Mawad-an it power supply ro mga lugar nga sakop it Akelco sub-station sa Lezo ag Nabas maghalin alas-6:00 it agahon hasta alas-6:00 it gabie.
Samtang, maga-brown out man ro Andagao ag Altavas sub-station halin alas-6:00 it agahon hasta alas-7:00 agahon kamana man alas-5:00 it hapon hasta alas-6:00 it hapon.
Mag-eowas kara, ginpahayag dugang ni Engr. Ropa nga sa adlaw it dominggo Setyembre 18, hay mawad-an man it supply it power ro sub-station it Akelco sa Caticlan ag isla it Boracay halin alas-6:00 it agahon hasta alas-6:00 it hapon.
Sa nasambit nga power interruption it NGCP hay igadungan man it Akelco ro andang isolation process nga igapatigayon.
