Magapatuman ro Department of Social Welfare and Development (DSWD) sa bulig it National Economic and Development Authority (NEDA) ag Department of Labor and Employment (DOLE) it makabag-ong sistema para sa mas maid-id nga assessment it mga nagakadapat nga benepisyaryo it Ayuda Para sa Kapos ang Kita Program (AKAP).
Raya hay kasunod it naging pagpueong it mga nasambit nga ahensya para istoryahan ro mga pwede pang improvements it programa.
Ginpaathag ni DSWD Secretary Rex Gatchalian nga nagdisenyo it makabag-ong sistema ro andang ahensya base sa naging veto message ni Pangueong Ferdinand Marcos Jr. nga nagatuyo nga solusyunan ro mga kinahang-eanon it mga maapektuhan it inflation nga mga nagakita it mas manaba pa sa minimum nga sweldo.
Dikara hay mas masukat sigon kon mismong ro mga benepisyaryo hay naaapektuhan it inflation ukon it mga nagalala nga presyo it mga baeak-eon sa merkado.
Samtang, ginpasiguro man ni Gatchalian nga ro mga guidelines it programa hay maipaeayo sa mga political influence para malikawan ro mga isyu it pamulitika it kwarta it kaban it banwa.
Padayon man ro ginahimo nga pag-amyenda it mga ahensya sa mga polisiya ag sistema it pagkilaea it mga benepisyaryo it nasambit nga programa.
